Spampavać.by - Праграмы

Руска-беларускі перакладчык Белазар онлайн

spshut — Tue, 22 Apr 2014 22:18:36 +0000

Белазар гэта найбольш вядомы і якасны руска-беларускі і беларуска-рускі перакладчык. Яго можна спампаваць на камп’ютар, а можна карыстацца і як онлайн перакладчыкам з рускай на беларускую і назад. Для машыннага перакладчыка Белазар працуе даволі добра і, несумнеўна, дапаможа вам зразумець тэкст, калі вы не вельмі добра валодаеце беларускай мовай, але яму шчэ далёка да сапраўды якаснага перакладу. Варта адзначыць, што ў слоўнікі перакладчыка можна дадаць новыя рускія і беларускія словы, калі іх там не было. Гэта праграма даволі разумная, перакладае не слова ў слова, а ўлічвае кантэкст і самастойна карэктуе пераклад. На сайце Белазара ёсць магчымасць усталяваць праграму на камп’ютар або хутка зрабіць двухбаковы беларуска-рускі і руска-беларускі пераклад онлайн. Калі вам лепей спампаваць Белазар на кампутар, то да яго неабходна дадаткова ўсталяваць свежыя слоўнікі. Слоўнікі і саму праграму можна ўзяць па спасылках ніжэй. Апроч іншага, онлайн-перакладчык Белазар разумее беларускую лацінку і можа перавесці кірыліцу ў лацінку і назад. Альтэрнатывай Белазару можа быць вядомы шматмоўны онлайн-перакладчык Google Translate, які таксама здольны перакладаць з рускай на беларускую мову і з беларускай на рускую, але паколькі ён не з'яўляецца такім вузкаспецыяльным, то якасць перакладу па азначэнні не можа быць лепей за белазараўскую. Калі ў вас на кампутары няма беларускай раскладкі клавіятуры ці вы проста не хочаце мець адначасова тры ці болей раскладкі, то вам будзе карысна ўсталяваць рускую раскладку з беларускімі літарамі і, ў, ’.

Правільны сцяг — бел-чырвона-белы сцяг у кожны браўзар

spshut — Tue, 25 Mar 2014 08:39:34 +0000

Мяркую не толькі Цмоку муляе вочы на разнастайных сайтах чырвона-зялёны значок побач са словам Беларусь. Здавалася б, што тут зробіш, как есть так есть, але нашы беларускія ўмельцы-праграмісты прыдумалі як выправіць такую памылку гісторыі хаця б у межах уласнага браўзара. Правільны сцяг — гэта пашырэнне для браўзараў Opera, Chrome і Firefox, якое замяняе на разнастайных сайтах выявы з чырвона-зялёным значком на сапраўдны беларускі бчб сцяг. Усталюйце ў сваім браўзары гэта пашырэнне са спасылак ніжэй каб часцей радаваць вока был-чырвона-белым нябесным вольным смелым :). Калі на пэўным сайце вы заўважылі, што сцяг не замяняецца, то паведамляйце аўтару праз адмысловую форму. Для карыстальнікаў Firefox Перад тым, як усталяваць Правільны сцяг для Firefox, вам неабходна ўсталяваць дадатак Scriptish або Greasemonkey. Правільны сцяг перыядычна абнаўляецца, таму вам будзе трэба час ад часу (раз на пару месяцаў) заходзіць сюды каб спампаваць абноўленую версію. У Chrome i Opera дадаткі абнаўляюцца самастойна. Апошняе абнаўленне: 25.05.2014.

Альтэрнатыўная беларуская раскладка клавіятуры — руска-беларуская

spshut — Fri, 07 Mar 2014 22:26:59 +0000

Выдатная раскладка для тых, хто хацеў бы мець на кампе беларускую клавіятуру, але не настолькі, каб усталёўваць больш за дзве раскладкі адначасова. Альтэрнатыўная беларуская раскладка — руская з беларускімі літарамі ґ, і, ў і ’ (апострафам). Маст хэв для латэнтных беларусаў :). Руска-беларуская раскладка працуе вельмі проста — націскайце адначасова AltGr (правы Alt) і г, и, щ, ъ каб атрымаць ґ, і, ў, ’. Спампаваўшы і ўсталяваўшы гэту раскладку, спрадвечную рускую раскладку можна выдаляць! Калі руска-беларуская раскладка клавіятуры абражае вашы патрыятычныя пачуцці, то ў вас ёсць магчымасць спампаваць беларуска-рускую раскладку з бонусамі ў выглядзе мноства тыпаграфскіх знакаў і не толькі. На нашым сайце ёсць інструкцыя для самых маленькіх пра тое, як усталяваць беларускую раскладку ў Windows. Калі вам патрэбны беларускія шрыфты, то яны ў Цмока таксама ёсць. Каб усталяваць гэту раскладку спампуйце і распакуйце архіў, потым запусціце setup.exe. Прыемнага карыстання!

Мапы навігатара для Android па-беларуску (бясплатна)

spshut — Sat, 15 Feb 2014 23:13:40 +0000

Прапануем спампаваць падрабязную мапу Беларусі для бясплатнага навігатара OsmAnd на Android. Будзе карысна ў падарожжы для ўладальнікаў планшэтаў і смартфонаў, выдатная альтэрнатыва Navitel. Акрамя мапаў навігатар мае беларускі інтэрфэйс і голас. Да таго ж мапы, якія можна спампаваць ніжэй, дазваляюць адлюстроўваць усе месцы Беларусі непасрэдна па-беларуску! Крыніца звестак для мапы — openstreetmap.org, у пэўным сэнсе вікіпедыя інтэрнэт-мап. Каб усталяваць беларускую мапу для навігатара Osmand неабходна зрабіць некалькі крокаў. Спачатку ўсталюйце на вашу Андроід-прыладу сам навігатар OsmAnd. Далей у наладах праграмы выберыце беларускую мову (Settings → General → Display language). Спампуйце мапу для навігатара са спасылкі ніжэй. Мапа -bel — кірылічная, -inlt — лацінкавая, выберыце адну з іх. Пакладзіце мапу ў папку Osmand на вашым тэлефоне або планшэце. Праверыць дзе дакладна знаходзіцца гэта папка можна ў Наладах → Агульныя → Каталёг захоўвання. Калі ўсё зрабілі як трэба, то зайшоўшы ў Налады → Кіраванне звесткамі ўбачыце мапу Belarus-bel 2. Каб усталяваць беларускі голас для навігатара зайдзіце ў Налады → Кіраванне звесткамі → Зладаваць ці абнавіць пазасеціўныя звесткі → адзначыць "голас be" → націснуць "Зладаваць". Пасля — Налады → Навігацыя → націснуць машынку → Галасавыя падказкі → выбраць беларускія. Пакуль што мапа перакладена не цалкам, аднак праект open-source і вы можаце яму дапамагчы. За мапы дзякуй Алесю Булойчыку, які стварае і падтрымлівае гэты праект.

Беларуска-руская раскладка клавіятуры

spshut — Wed, 05 Feb 2014 23:13:51 +0000

Беларуска-руска-ўкраінска-тыпаграфская раскладка ад Zedlik’a дапамагае вырашыць вядомую нязручнасць, калі адначасова стаяць беларуская, расійская і англійская раскладкі. Чытайце далей, калі вам гэтае пытанне баліць таксама як і мне :) Як усталяваць звычайную беларускую раскладку у Windows я нядаўна пісаў. Усталяваўшы пакунак з гэтай выдатнай раскладкай і дадаўшы яе на моўную панэль, можна спакойна выдаляць расейскую раскладку клавіятуры, пакінуўшы толькі беларускую і ангельскую! Цяпер калі вам спатрэбіцца літара и, ъ або щ іх можна заўсёды атрымаць, націснуўшы правую клавішу Alt (AltGr) адначасова з клавішамі і, ў, ’. Але гэта шчэ не ўсё! У дадзенай раскладцы чароўная клавіша AltGr (правы Alt) самастойна і ў спалучэнні з Shift адчыняе доступ да іншых карысных знакаў, што вельмі ўсцешыць асоб, прагных да добрай тыпаграфікі. Доўгі (—) і сярэдні (–) працяжнікі, двукоссі («„“»), зна́к на́ціска, шматкроп’е (…), ярылаў крыж (‡), дробы і матэматычныя знакі (¼ ³ ² ¹ ‰ × ≠) прывядуць эстэтаў у тыпаграфскі аргазм™. У шаноўнага спадара Зэдліка таксама ёсць адмысловая лацінская раскладка для праграмістаў, якая ўмее ўсё тое ж, што і вышэйапісаная, але шчэ ўтрымлівае знакі беларускай лацінкі. Спампаваць гэты цуд праграмісцкай творчасці магчыма тут у скарбонцы Цмока або з сайта аўтара.

Беларуская раскладка клавіятуры (усталяваць)

spshut — Sat, 01 Feb 2014 21:57:23 +0000

Беларуская раскладка клавіятуры ўжо ёсць у Windows і няма патрэбы яе аднекуль спампоўваць. Каб усталяваць беларускую раскладку ў панэль моваў зрабіце ўсяго некалькі крокаў: Правай кнопкай мышы пстрыкніце на панэлі моваў і выберыце пункт "Параметры..." У дыялогу ўсталявання раскладак націсніце "Дадаць" У спісе вылучыце беларускую раскладку і націсніце "ОК" Беларуская раскладка дададзена! Вы можаце змяніць парадак пераключэння клавіятур націскаючы кнопкі "Ўверх" і "Ўніз" І не забудзьце пстрыкнуць "ОК" яшчэ раз. Гатова! Вы дадалі беларускую мову на моўную панэль.